Zum Flaucher hod Tradition: Im 19. Jahrhundert erkannte der Wirt Johann Flaucher, dass des ehemalige Wittelsbacher Jagddomizil umgeben von dichtem Wald a ideales Ausflugslokal sei dad. Ab 1871 strömten dann imma mehr Münchner in de Isarauen. „Geh’ ma zum Flaucher” is seitdem in München a g’flügelts Wort. Treffa den se Studenten, Banker, Taxler, Hausfrauen, Rentner, Schüler, Touris, Sonnensüchtige, oiso oafach alle…und sogar frisch valiabte. Da Flaucher is fia de Sendlinger a absolutes Muss. D’ Stammgäst fahr’n jeden Dog 20 Kilometa mit’m Radl hi. Manche vo dene san scho üba 80 Jahr oid und san praktisch de Dorfheiligen die eana Mass ois Eisheilige im gekühlten Krug griagn.
Der Biergarten hod Blotz fia 1700 durschtige und a fia’d Rollifahrer is gsorgt.
D’Mass Bier kost 6,60 EUR und a hoibs Hendl griagst fia 5,70 EUR
Damids’t in Rua dei Bier dringga konnsd gibt’s fia de Zwergal an riesigen Spuiblotz. Und wenns’d ned gern alloa bissd, gibt’s a gnua fesche Madl und Buam zum flirten.
Offen hod da Flaucher von 11 – 23Uhr und des jeden Dog wenn’d Sonna scheint.
Hi komma duasd am besten mit da U3 Brudermühlstraße oder mit’m 54er Bus Schäftlarnstraße

A gmiatlich’s Platzerl an der Würm find`ma im Kraillinger Biergarten, oda andere bessa bekannt ois as Pe.Es.Kottmeier in da Bräuhausstr. 18 in Planegg. Entgegen aller Vorurteile sitzn in dem Biergarten ned nua Yuppies im feina Zwirn, de wo sie an Obazd’n auf’d Designerkrawatt’n schmiern. Na, es traun sie a normale Leit in den scheena Biergarten.
D’ Mass Export griagst für 5,70 EUR und a große Brezn fia 2,70 EUR. Bsondas empfehlenswert is des niederbayrische Schweinehoisgrat mit Erdäpfe Salod fia ned amoi 8 EUR.
Alles in allem a netta Biergarten.

Wia des so is bei uns auf'm Land in Oberbayern, is die Auswahl an Supermärkte ned grod gigantisch. Und deshalb hod si da Tengelmann, schlau wia er is, in jeds Kaff nei'pflanzt um no reichs z'wern, wenn mia sei teia's Zeig kaffa miassn. Miassn miassn ma ja ned, wei I kannt mi ja a ins Auto hogga und woanders hifahrn, aba liaba geh I hoid z'Fuas zum Tengelmann und schimpf dann dahoam, wia vui geld mia der Dregg-Hamme' wieda aus da Taschn zogn hod. Freili gibt's imma Super Frische Sacha und a grosse Auswahl. Ned z'vergessn die freindliche Bedienung an der Fleisch- und Wurschttheke, von der I gern a bissal mehr hätt...wenn's mi nach'm wiegn frogt ob's a bissal mehr sei derf :-) Oanziga Minuspunkt is wenn grod a moi wieda sämtliche Rentner eikaffa san und an da Kasse an Stau produziern, wei's eana'n Geldbeitl ned find'n oda d'Geheimnumma von da EC-Kart'n vagessn hom...

Fia mi ois waschecht'n Bayer is des scho a grosser Schritt si in a Lokal nei'z traun wo's koan Schweinsbrodn gibt. Aba ins Tsuki-Ji, wia des ehemalige Minh jetzad hoassd, konnsd a ois Münchner nei'geh und Du brauchsd a koa Angst hom das die auf da Bahre wieda nausdrogn. Wia da Name scho sogt gibt's da drin asiatisch's Essn und davo sovui wia'sd in dein Ranzn nei'griagst. "All you can eat" is die Devise und Du konnsd da sicha sei, das ois imma frisch is. Grod in da Mittags-Zeit a sehr beliebta Treffpunkt vo hungrige Münchner.

Des is ja scho wieda länger her das I im Treibhaus mei Unwesen trieben hob, aba es war immer schee. Der Wirt is ja der Gottfried und der woas wia ma des meist junge Publikum musikalisch wach hält, besonders zu später Stunde. Da ja in Pullach für das Nachtaktive Volk ned grad viel geboten wird, muss ma halt versuchen das Beste draus zum machen. Und sei's nur mit die guadn Cocktails oder aber mit kloane Snacks aus der Küche. Im Sommer konn ma übrigens super draussen stzen mit am gigantischen Ausblick auf die Isarauen.