Des Undosa am Starnberger See hod ja moi den Ruf g'habt "Eintritt erst ab 60+"
Wos soi I sogn, de Zeit'n hom si g'ändert, GottseiDank und ma trifft si nimma nua zum Tanztee am Sonndog Nachmittag, wenn da Zither Mani oan auf DJ machd und seine Roy Black Vinyls nauf und nunta spuid. Vui mehr is des Undosa inzwischn a Treffpunkt fia jung und alt, egal ob zu diverse Ü30/40/??-Feten, oda einfach zum chillen und/oda o'bandl'n.
Ganz ab'xeng vom nächtlichen Vergnügen konn ma a ganz guad speisen im Undosa und dabei den Blick auf'n Starnberger See geniessen.

Wia schauggd’s aus mit a neia Frisur fia dein next’n Auftritt im Biergarten? Ned nua das di de andan nach dei’m letztn Rausch vielleicht ned glei wieda kenna sondan um moi wieda an frisch’n Wind in dein fad’n Alltag z’bringa. A guada Platz dafia is da elegante Salon der Sta-Friseure, ned nua wei a direkt im Zentrum, zwischen am Hofbräuhaus und da Maximilianstraße liegt. Der Familienbetrieb konn auf üba 20 Jahr Berufserfahrung z’ruggbligga, Du konnsd Di aiso ganz beruhigt in die erfahrna Händ’ vom Stylisten begehm.

Bevor’s mit Deina Veränderung los gehd, griagst a ausführliche Typberatung. Nachdem’z Eich auf a Frisur geeinigt hobtz, entspannst Di bei einer angenehmen Haarwäsch, hoggst dann im bequema Sessel und konnsd in de großen Spiegel jedn Handgriff von de Profis beobachtn.

Zum Schluss griagt Dei Frisur feili des passende Finish beim Föhnen und Stylen. Manna wia a Weibal kenna si a paar Stund de wohlverdiente Auszeit nemma.

Hoi Da frisch’n Wind ins Haar und vazauber Dei Umfeld beim next’n Besuch im Biergarten mit Deim neuen atemberaubenden Look!

Brandaktuell zua Urlaubszeid konn I eich DEN Koffer- und Taschenladen in München am Stachus empfehlen. Da Hetzenecker am Karlsplatz is woi des kloanste und zugleich gresste Koffer-G'schäft wos I in München kenn. Glei wennsd neikimmst muassd links üba a Art Wendeltreppn nauf in den großen Verkaufsraum. Du hossd wennsd an dene Unmengen Leid die sich da neizwängen erstmoi vorbeikomma bissd des Gfui das sovui Taschen, Koffer und wos woas I no eigentli gar ned gem ko'. Alle Formen, Farben und Größen und für jede Gelegenheit gibt's zum kaffa. Von da 08/15 Schultertasch'n bis zua Designerbag is wirkli fia jedn wos dabei...Nua find'n muassd das hoid. De Vakäufer san auf a Skala von superfreindlich bis super o'gfressn, je nach Tageszeit und Besucheraufkommen. Oa Phänomen gibt's a no beim Hetzenecker, seid I den Lad'n kenn is imma Schluss- Räumungs- oda wos woas I Verkauf. Aiso Männa, macht's eia Madl glücklich und kafft's Ihr a nei's Dascherl.

D’ Outland Bar am Weißenburger Platz is a pfundiga Kontrast zum üblichen Münchner Style. Da sogn si Känguru und Koalabär guade Nacht – und zwar auf Englisch, wei Sitten und Gebräuche san wia in Bayern a do authentisch – hoid ganz wia in Down Under. Ma b’stellt seine Getränke an da Bar und konn’s a glei selba mit nemma. Auf da Speis’kartn findst de typisch’n Aussie Speis’n aus Känguru- und Haifleisch.
In da Outland Bar griagst a Australien, wossd so bestimmt no ned xeng hossd. Da Crocodile Dundee is endlich im 21. Jahrhundert o’kemma mit klassische und moderne australische Ideen. Modern und chillig kimmt’s daher die Outland Bar, mit am stylisch beleucht’n Tresen, a gmiatliche Lounge-Eck’n und am absoluten Eyecatcher: a super lang’s Aquarium ois Raumteiler, aba ohne Haifisch. Zum ofanga gibt’s g'füllte Auberginenröllchen, danach issd an leggan Känguru-Burger oda Du probierst moi a saftig’s Emu-Filet – Du hossd die freie Wahl! Oans is aba scho moi sicha: Entscheidst Du Di fia den legendären Busch-Burger, den ma insgeheim scho ois besten Burger Münchens handelt, werst Du no Wocha späda vom Outland schwärmen. Vaschbrocha! Und zum dringga gibt’s aussa’m eisgekühlten Fosters a fruchtige, frische Cocktails.

Didgeridoo…Du Saupreiss

Da Biergarten Holzeder is des Jahr umbaut und neu eröffnet worn. In idyllischer Atmosphäre an da Olympiastraße 5 in Wangen konnsd dei Tegernseer oda Schneider Weißbier geniessen und dazua Brotzeiten wia Obazd’n, Wurschtsalod und an Radi schmegga lassn.
An de Wochenend’n werd herzhaft grillt: Dann gibt’s Spareribs, Hoisgrod, Würscht’l oda an legga'n Steggalfisch.
Den Biergarten finds’t ganz einfach an da beliebt’n Radlroute von München an Starnberger See.
Offen is jedn Dog von 11.30 – 23 Uhr.
Die Maß Tegernseer Hell vom Fass kost’ anständige 6 Euro und a Portion Obazdn griagst fia 4,50 Euro.

Wenns'd auf Bifteki, Mousaka, Lammhaxn mit Reisnudeln in Tomatensoss', Babykalamari vom Grill mit Schafskäse g'füllt stehst, nachad muassd unbedingt nach Laim ins Troja geh. Da werd wirkli no ois frisch und mit vui Liebe kocht und d'griechische Gastfreundlichkeit werd da wirkli ausg'lebt. Wer nua gmiatlich a Bier dringga wui is in dem wunderscheena Biergarten bestens aufg'hom und konn am next'n Sonndog auf a riesign Leinwand a des WM Finale o'schaun. Der Lod'n hod übrigens bis um oans in da Nacht off'n und is a wos fia de Münchner Nachtschwärmer. Aiso, Yamas sog I...

Ehrlich xogt in München gibt’s vui große und kloane Biergärten. 50 davo san vor a paar Dog wieda moi in a Münchner Tageszeitung vorg’stellt worn. Uns wundert’s aba imma wieda, dass d’ Olympiaalm ned erwähnt werd, wei’ scho seltsam is, da Wintergarten am Elisabethplatz is a ned vui greßa, aba der steht mit drin.

Zu Beginn da 70er Jahr ursprünglich a Kiosk fia’d Arbeiter, die as Gelände fia’d Olympischen Spiele 1972 erbaut hom. Boid scho schätzten vui Münchner die vasteckte Biergarten-Gmiatlichkeit und da höchste Biergarten in München (564m) is entstandn.

Zum Dringga gibt’s a leggas Ayinger im Maßkruag oda fian kloana Durscht a ois hoibe und an da Grillstation griagst a Riesenportion Sparerips…und vui andere bayerische Biergartenschmankerl vom Obatzdn bis zum Schnitzel mit Pommes.

Weltbekannt is as „Hofbräuhaus“ ois typischstes aller typischen bayerischen Wirtshäuser vor allem wega da berühmten Schwemm’, da phänomenalen Stimmung und feili wega de beliebten Hofbräu-Biere. Des woas da Japaner und da Neapolitaner genauso wia da Rosenheimer und da Giesinga zum schätzen und deshoib laffa’s as ganze Jahr zum Wahrzeichen Münchens.

Die Ur-Münchner Atmosphäre, da köstliche Gerstensaft und nette Bekanntschaften aus aller Welt macha an Bsuach im „Hofbräuhaus“ zu am einzigartigen Erlebnis. So vabringt mancha Besucher vui glückliche Stunden ohne a ganz b’sonders Schmuckstück xeng zum hom: Da Biergarten im Innenhof vom „Hofbräuhaus am Platzl” guit imma no ois a echter Geheimtipp. Selbst „Eingeborene“ kemma, wenn’s nach de scheenstn Biergärten im Herzen da Innenstadt gfrogt wern, auf Anhieb ned auf den total ruhigen Ort mitten im geschäftigen Treiben vom Stadtzentrum. Duach den grossn Torbogen kimmt ma in diese Bier-Oase, ois dad si a andere Welt auf. Die Kastanien schirmen den Biergarten vor Wind ab, spenden guadn Schatten und hoitn dei Bier schee kühl. Am idyllischsten is mit Sichaheit a Platzerl glei neba dem Brunnen in da Mitt’n vom Biergarten, der üba 500 Plätz hod.

As Publikum im Biergarten is imma sehr unterschiedlich z’samma g’würflt: Da konn’s guad sei, dass si neba am Postla, am Gerhard Polt, am Pfaffn oda am Filmproduzenten a de thailändische Prinzessin des süffige Hofbräu-Bier munden lasst.

Wenns moi wieda länga dauert hod im Biergarten oda auf am Festl, nachad geh I gern in de Apothekn, wei do werd da wirkli g'hoiffa. Do brauch I erst gar nix sogn, da hom de kompetenten Damen mit eanare scheena weissn Kittl scho de Familienpackung Aspirin in da Hand fia mi...Aba a wenns'd an Katarrh hossd oda grod jetzad mit dem Pollen-Zeigl zum doa hossd, griagst Du imma a Super Beratung und des passende Pillen-Doserl dazua. Mei Tipp: Wenn da Schädel sauba brummt, nachad bissd warscheinli ned xund!