s'Lustspielhaus is imma an Bsuach wert. Weil da einfach so guade Leit wia da Alf Poier, Michael Altinger und Django Asül auftreten. Die konn ma zwar a woanders oschaun, aba im Lustspielhaus in da Occamstrass hod ma einfach a ganz a griabige Atmosphäre, ma fühlt si glei wohl und konn si ganz auf de Darsteller ei'lassn.
Wer bei dem ganzn Theater a no an Hunger griagt is a bestens vasorgt. No bis Ende Februar gibt's a Menü wos da alle 10 Finger abschlegga konnsd: Petersilienwurzelsuppn mit Trüffel und broatne Parmaschinkenstreifen ois Vorspeis, danach a mit Marone gfüllte Poulardenbrust mit Steinpilzsauce, Romanesco und Schupfnudeln und zum guadn End no a Orangen-Bananenmousse mit Feigensauce.

Eigentlich gibt's ned vui zum sogn - oda war oana von eich no ned im "Lätschnbrai-Keller"? Wia a imma, die näxtn Wocha geht's wieda rund wenn die legendären Faschingsbälle im Löwenbräukeller stattfindn, wia zum Beispui da "Filserball" oda ganz klar oan Dog späda "Schabernackt". Wer hod ned davo draamd sei Faschingsprinzessin oder Prinzn da zum treffn...

Nebel wabert duach die finsteren Straßen vom East End. A schriller Schrei zerreißt die Stille! A Messer blitzt! A dunkle Gestalt verschwindt in da Nacht. Jack the Ripper hod wieda zuagschlogn!
London, 1888. Ihr seiz Zuschauer bei da gerichtlichen Untersuchung da Ripper-Morde. Die geheimnisvolle Alexandrina Kent beschuldigt Inspektor Abberline, dass a da Mörder is. Ihr begleitets d' Mrs. Kent bei ihra Beweisführung in die skandalöse Show des magischen Houdinus, in die schreckliche Irrenanstalt von Dr. Hydy und auf an unheimlichen Friedhof, auf dem Leichendiebe ihr Unwesen treibn. Konn da Ripper heid Abend tatsächlich enttarnt wern? Oda werd die Wahrheit niemals ans Licht kemma?
A mörderischer Spaß erwart eich: Bei dem schaurig-komischen Grusel-Dinnertheater is ma hautnah dabei, s' Publikum is Teil da Handlung. Zwischen den Szenen serviern eich die Küchenmörder a leckeres Menü. A spannende Mischung aus Dinner und Theater.

Des ganze gibt’s am Samstag, den 20.02.2010

Da Rabenwirt in Pullach is alloa scho an besuch wert wega dera grandiosen Aussicht von da grossn Terasse üba's Isartal. Vui Platz fia vui Leit, erstklassiga Service und feinste Speisn macha'n Rabenwirt zu am Erlebnis. Innen konnsd in am griabign Ambiente schee essn, draussn gibt's im Somma a scheene grosse Bar, wo da da Barkeeper gern an guadn Cocktail mixt. S#oanzig bläde is wenn grod a Buss voi Touristn kimmt, di wia de narrischn d'Aussicht ins Isartal seng woin.

Wos soi I sogn, ned nua de Lage is 1A, es gibt nirgends anders an bessern Mafia-Kuacha wia in da Villa Antica. A grandiose Auswahl an guadm Essn, a Atmosphäre wia wenns'd direkt in Bella Italia warst und des a no zu erträgliche Preise. Aussadem hod's no an Feinkost Lodn wos feinste italienische Spezialitäten fia dahaom gibt. Wenns'd scharf auf Promis bissd hossd a guade Chancen zum seng wos fia Autos de Spieler vom FC Bayern hom...
An extra Pluspunkt griagt d'Villa vo mia, wei's jeden Mondog die Hauptschui in Pullach mit der leckern Pizza zum Selbstkostn-Preis beliefan.

Da Biergartler hod si fia eich in schwindelerregende Höhen draud, bessa xogt auf knapp 300Meta um de vier Buaschn von oana da attraktivsten Newcomerband “Grand Avenue” vo unsare nördlichen Nachbarn auf eanam exklusiven Showcase im Rockmuseum vor knapp 100 Leit auf’m Olympiaturm zum seng und hörn. Und I sog eich die Buam hom’s wirkli drauf.

Die Band um den g’frogtn Frontmann Rasmus Walter Hansen hod mit ihrem Auftritt an weitern grossn Schritt auf’m deutschen Musikmarkt g’start. Speziell beim weiblichen Publikum kimmt der attraktive Sänger o, wos duach a Liaison mit’m Top-Model und Schauspielerin Helena Christensen a scho ausführlich in Deutschland thematisiert worn is. Spätestens nach da zwoat’n Nummer hod’s mi a nimma g’wundat das de Alternative Pop Rocker von Grand Avenue fia ihre erstn zwoa Alben mit’m Danish Music Award auszeichnet worn san. Speziell da Frontman Rasmus woas mit seina ausdruckstarkn Stimm’ und seina bsondern Art sei Publikum z’ begeistern.
Bleibt zum Hoffen das a in Zukunft no vui Newcomer und a Oide Hasn ins Rockmuseum kemma um d'Leit zum begeistern, wia's Metallica, Pink und so weida scho g'macht hom.

Ois oana da scheenst’n Platz’l im Herzen Münchens, is da Biergarten am Nockherberg längst zua oana liab g’wonnana Institution g’worn, eigentli’ scho fast zu am Stückl Münchner Kulturgut g’worn.
G’selligkeit und Lebensfreude, dazua a griabig’s Angebot an Speisen und Getränke und an schee o’glegtn Spuiplatz fia de kloana Scheissa mit seine oidn, schütznd’n Kastanienbaam machan vui Spass.
A liab g’wonnane Tradition, im »Paulaner Garten am Nockherberg« san b’sondere Veran-
staltungen in da Biergartensaison, wia z.B. as traditionelle Lampionfest.
Obwoi’s 2000 Sitzplätz’ gibt muassd bei scheena Weda fria hi’geh, weis’d sonst koan Plotz griagsd.

Da Augustiner am Dom mit seine gmiatlichn 3 Etagen is zwar ned unbedingt da klassische Biergarten wia is eich sonst vorstell. Aba mei oida Schui-Spezl, da Schmutzer Peter is da Wirt vo dera Boazn und deswegn mecht I eich heid de Wirtschaft ans Herz legn, vielleicht fia eian Vatertags-Ausflug ois a spezielle Station. Insgesamt 400 Plätz gibt’s im
ganzen Haus. D’ Augustiner-Stum und da Domblick hom a Kapazität
fia bis zu 250 Plätz. Jede Etage hod a eigene Barthekn.
Alle Stockwerk san a mit’m Lift z’ erreichen, wos nach a Mass oda zwoa ned unwichtig sei ko!
Und wenns’d drauss hogga wuissd, geht des natürlich a…
Offen hod da Peter jedn Dog von 10:00 – 24:00 und a durchgehend warme Küch’.

A neis Schmuckstückal hob i fia eich in Moosburg gfundn – Da Staudinger Keller -
In dera gmüatlichn Wirtschaft gibt’s an Saal fia gsellschaftliche Anläss bis zu 65 Leidl, a Gaststubn im rustikalen Stil mit Barbetrieb und Musik und a guad bürgerliche Kuchl, Brotzeiten und Pizza.
An Sonn- und Feierdog gibt’s z’ Mitdog boarische und internationale Küch.
Offen hod da Staudinger Keller jedn Dog ab 9ne in da Fria.
Und wenn Saison is veranstaltet da Wirt imma griabige Isar-Flossfahrt'n mit Musik und Brotzeit und gnua Bier zu vanünftige Preise.